لو بھئی گاجر کا حلوہ

دیار غیر میں پاکستانی کھانوں کا اپنا ہی مزہ ہے۔ ویسے تو ہم پاکستانی کھانے بڑے شوق سے بناتے اور چسکے لے لیکر کھاتے ہیں مگر کچھ کھانے تیار کرنے کیلئے بڑی محنت و مشقت کرنی پڑتی ہے۔ گاجر کا حلوہ بھی انہی لذیذ کھانوں میں سے ایک ہے جسے تیار کرنے کیلئے وقت ، مشقت، اور محنت کیساتھ ساتھ آپ کو پائے کی ہمت اور حوصلہ بھی چاہئے ہوتا ہے۔ سردیوں کا موسم ہو اور گاجر کا حلوہ نہ ہو تو بات کچھ ادھوری ادھوری سی لگتی ہے۔ گھر میں امی جب سردیوں میں گاجر کا حلوہ بناتی تھی تو بڑے مزے لے لیکر کھاتا تھا۔ اگر کبھی وہ گاجریں کدوکش کرنے کا کہتی تو چھوٹے بہین بھائیوں کو کبھی ڈانٹ ڈپٹ کر اور کبھی منت سماجت کرکے گاجریں کدوکش کروا لیتا۔ لیکن یہاں کیا کرتا؟ کس کو ڈانٹتا؟ قاضی صاحب جب ڈھیر ساری گاجریں اور سازوسامان لیکر گھر میں وارد ہوئے تو حکم ہوا کہ گاجروں کو کدوکش کرنے کی ذمہ داری میری ہے۔ پہلے تو قاضی صاحب کو دل میں بہت کوسا، بہت برا بھلا بھی کہا لیکن پھر چپ ہو گیا۔ آپکو بتاتا چلوں کہ میں، قاضی صاحب، سلیمان بھائی، سمیر بھائی اور قیصر بھائی ایک ہی گھر میں رہتے ہیں۔ میں نے قاضی صاحب سے جان خلاصی کی کافی کوشش کی مگر وہ نہ مانے اور مجبورا مجھے انکی چھٹی یا ساتویں آواز پر میدان میں کودنا پڑا۔ چھ سات کلو کے لگ بھگ گاجریں قاضی صاحب نے چھیل کر میری خدمت میں پیش کیں۔ ایک دفعہ پھر دل میں قاضی صاحب کو کوسنے کا سلسلہ شروع ہو گیا۔ اللہ اللہ کرکے میں نے پرانی باتیں بھلا کر گاجریں کدوکش کرنا شروع کیں۔

سلیمان بھائی دعا کا ورد کرتے وے نظر آ رہے تھے کیونکہ انکی وجہ سے اور انکی دعاوں کیوجہ سے ہمارے پکوان کافی لذیذ ہو جاتے ہیں ۔ لیسا لہا من دون اللہ کا شفا، اگر کھانا پکانے کے دوران یہ دعا سمیت درود شریف کے پڑھی جائے تو کھانے کا ذائقہ بہت اعلی ہو جاتا ہے۔ قاضی صاحب گاجریں چھیلنے میں مصروف تھے، سمیر صاحب ہماری نگرانی کیساتھ ساتھ اپنے روزمرہ کے کام و کاج میں مصروف تھے اور قیصر بھائی اس پکوان کے بارے میں سب کی رہنمائی کر رہے تھے۔ غرض، ہر کوئی کسی نہ کسی صورت حلوہ تیار کرنے میں اپنا بھرپور کردار ادا کر رہا تھا۔ اس کے لیئے انگریزی میں ایک خاص اصطلاح استعمال کیجاتی ہے جسے ‘ٹیم ورک’ کہتے ہیں۔ مسلسل چھ گھنٹے کی محنت کے بعد رات ساڑھے بارہ بجے گاجر کا لذیذ حلوہ تیار ہوا جسے نوش فرمانے کیلئے کچھ مہمان بھی مدعو کیے اور میں نے اپنے کچھ انتہائی قریبی دوستوں کے گھر ٹفن میں ڈال کر دے آیا۔

حلوہ کھانا شروع کیا تو امی کے ہاتھ کا ذائقہ یاد آگیا۔ بہت لذیذ اور خوش ذائقہ حلوہ تھا جسے کھوپرے، کشمش اور بادام سے مزین کیا گیا تھا۔ میں اپنے تمام بھائیوں قاضی صاحب، کوسنے کیلئے انتہائی معذرت، سلیمان بھائی، سمیر بھائی اور قیصر بھائی کا تہہ دل سے مشکور و منون ہوں کہ انہوں نے اتنی محنت کی۔ جزاکاللہ۔